Unaikumbuka Hii Kwsi ya Watu Waliokamatwa na dawa za kulevya KIA kortini

Moshi.Raia watatu wa kigeni waliokamatwa hivi karibuni kwa nyakati tofauti katika Uwanja wa Ndege wa Kilimanjaro (KIA), wakituhumiwa kusafirisha dawa za kulevya wamefikishwa katika Mahakama ya Hakimu Mkazi Moshi na kusomewa mashtaka matatu tofauti
.

Watuhumiwa hao waliopandishwa kwa nyakati tofauti katika mahakama hiyo, ni pamoja na Josian Crepy (25) raia wa Togo na Julius Nyaoro, anayesadikiwa kuwa raia wa Kenya anayeishi Chanika Tangini Dar es salaam na Grace Gratu (24) raia wa Liberia walikamatwa mapema mwezi huu katika Uwanja wa ndege wa KIA .

Mtuhumiwa wa kwanza kupandishwa mahakamani hapo alikuwa ni Grace Teta Gratu (24),ambaye alisomewa shtaka la kukamatwa akiwa na kilo 10.5 za dawa za kulevya aina ya Cocaine.

Mbele ya Hakimu Mfawidhi wa Mahakama ya Hakimu Mkazi Moshi, Simon Kobelo, Mwendesha Mashtaka wa Serikali, Janet Sekule aliieleza mahakama kuwa, mtuhumiwa huyo anashtakiwa kwa kosa la kusafirisha dawa hizo za kulevya nje ya nchi kinyume cha sheria.

Akisikiliza maelezo ya shtaka hilo, hakimu Kobelo alisema kwa mujibu wa sheria ya dawa za kulevya kifungu namba 16 sura ya 95 ya mwaka 2002 iliyofanyiwa marekebisho mwaka 2012 mahakama hiyo haina uwezo wa kusikiliza kesi hiyo.

Kwa mujibu wa sheria ya dawa za kulevya iliyofanyiwa marekebisho kifungu cha 1 (a) makosa ya kusafirisha dawa hizo yanasikilizwa na Mahakama Kuu na adhabu yake ukipatikana na hatia ni kifungo cha maisha na kwamba kesi hizo hazina dhamana.

Shauri la pili lilikuwa ni la kula njama na kusafirisha dawa za kulevya, watuhumiwa walikuwa ni Josian Dede Crepy (25) wa Togo na mwenzie Julius Michael Nyaoro mkazi wa Chanika Tangini Dar es salaam.

Akitoa uamuzi wa mahakama baada ya kusikiliza maelezo ya mashtaka yote mawili, Hakimu Mkazi, Timotheus Swai alisema kesi hiyo inasikilizwa na Mahakama kuu na kesi hiyo imeahirishwa hadi Disemba 24, mwaka huu.